Yus Dt Prapatiah – Pitaruah Ayah Untuak Calon Pangulu


Assalamulaikum wr wb

Bismillahirrohmanirrohim.

Manolah  nak kanduang ayah, ka mari-mari anak duduak duduak ado rundingan ka disabuik. Ayah ingin bamuko-muko basurah batutua panjang bakato ba mungkin-mungkin. Nak lapeh sasak didado nak lansai utang ka bayia, jannyo takalang-kalang juo ibaraik duri dalam kuku bak tulang karongkongan kini malah ayah lafazkan. Waang kan alah tau juo nak, dalia nan sakah kaadaan satantang badan diri ayah. Umua samakin laruik juo bak hari bajawek sanjo. Lah sirah cayo muntari manunggu luluih ka tabanam. Tubuah lah puak kudaraik habih darah dingin bathinlah kandua paratian lah lamo puda. Sagalo pasak lah habih ranggang, satiok kabek lah habih lungga, serak baserai jo bagian itu nan lazim pado alam.

from www.kiwidandd.multiply.com

Pangulu

Apo nan lazim pado alam, daulu inyo tiado kudian barunyo ado akhianyo lanyap tak basiso. Jikok diliek pado nan lahia nak, dipandang-pandang dalam camin umua ayah indak ka lamo. Antah beko antah barisuak  ajadulah datang manjapuik nan punyo tibo mamanggia. Dari tanah suruik ka tanah pulang ka asa mulo jadi dunia balipek hanyo lai. Dek sabab karano itu nak, mananti ajal balun sampai tarago nyawo dalam tubuah salagi hangok turun naiak, nak ayah sudahkan karangko cinto nan lansai bangkalai kasiah, sayang nan tibo digunjainyo sinan salasai palangkahan. Oh nak kanduang sibiran tulang ubek jariah palarai damam si dingin tampa di kapalo, buah hati limpo bakuruang gantuangan ayah jo bundo. Anak mudo salempang dunie sumarak kaum Caniago pamenan suku rang Sikumbang bungo ka kambang di nagari. Dangalah melah elok-elok nak, simakkan bana nyato-nyato, mak jaleh makna paham nak sahiah sasaran kato. Piliahi sado nan taserak kampuangkan kok inyo taganang, ambiak nan boneh ka tinaman nan hampo bialah hanyuik.

Penghulu by Eddy S - West Sumatra - A Journey to Paradise_files

*******

Adi dunsanak sakampuang saranah minang dimano sajo barado, barikuik kami lewakan Pitaruah Ayah Untuak Calon Pangulu dari angku Yus Dt Prapatiah pimpinan Balerong Group Jakarta, semoga ado manfaat nan bisa kito ambiak untuak mambangun nagari asa kito masing-masing. Pabilo dari dunsanak ado nan bakalapangan, donasi bisa dilakukan lansuang mahubungi angku Yus Dt Prapatiah rang nagari Sungai Batang salingka danau Maninjau pado nomor 0815 971 9761. Demikian sajo nan bisa kami sampaikan, kok ado nan takurang, salah jo jangga itu datangnyo dari kami sabab nan bana hanyo datang dari Allah azza wajalla.

wasalam

Armen Zulkarnain
Padang

Pituah Ayah Untuak Calon Pangulu – Yus Dt Prapatiah

Pituah Ayah Untuak Calon Pangulu - Yus Dt Prapatiah

Pituah Ayah Untuak Calon Pangulu - Yus Dt Prapatiah

Yus Dt Prapatiah – Babaliak Ba Nagari (free download)


Assalamualaikum wr wb

Manolah angku, mamak, bundo jo adi dunsanak sapalanta PAM nan kami muliakan,

Bismillahirrohmanirrohim,

Ibaraik kapa tangah lauik nan dihayak dek galombang gilo dihampeh-hampeh badai. Pidoman kalam bakuliliang, aie ganang diburitan, karang mahadang suo kida tampan ka karam hanyo lai. Disalo pakiak pasisianyo, tadanga sorak dianjuangan manyuruah babaliak pulang puta haluan ka pangkalan. Juru mudi manyintak lahia, bakayuah baganjua suruik manuju taluak palabuahan, tampek asa mulai batulak.  Itulah misa jo umpamo sutan, Minangkabau sangkek ba desa dibawah rezim orde baru, sampai manggaga reformasi. Sialah urang ka manyangko, awak nan sadang tagak tali bak kabau mahampang jalan. Tibo garak angin bakisa nan kodoh bapidah tangan, lalu kalua undang-undang banomor 22 tahun 1999, iyolah sorak otonomi. Siriah babaliak ka gagangnyo, pinang pun suruik ka tampuaknyo lah pulang mamak nan hilang. Salamaik jalan bapak kades, salamaik datang inyiak wali, kito babaliak ka nagari. Jaza kumul wal khairat, tarimo kasih baucapkan.

Lintau

Lintau

Nak siang tarang bak hari mak asah tarang bak bulan sinan ka saiah ka maknanyo.  Molah … suruik disilau maso nan talapeh pambandiang zaman nan katibo. Usah basuo kecek pantun apolah bunyi pantunnyo,

Kapak siragai panutuahnyo,  ijuak tajalin jadi atok Galak badarai daulunyo, isuak manjadi buah ratok.

Mari kito baco kisah lamo simak di sutan elok-elok,

Kok masak satangkai tolong tuai masak sarumpun makan sabik Boneh naiakan ka rangkiang, hampo tinggakan dibalerong salah dek kami nan batanam.

Kok tibo tanyo jo siasek satantang babaliak kanagari kamano kito salamo ko? Jawabnyo indaklah lain, ulah dek saik penguasa urang bakasiah dicarainyo, nagari disiliah desa-desa, Minangkabau mati marano. Adopun nagari di Minangkabau bak ikan di dalam aie sutan. Hilang tuahnyo tabek gadang salamo puyu nan baranang inyo biaso dalam lunau. Sistem badesa jo balurah mungkin cocok untuak rang lain, tapi bukan untuak rang minang.  Survey mambuktikan, 20 tahun maso mancubo Sumatera Barat mamakai desa, nyatolah dalia sakahnyo gadang rugi dari labo dapek panjaik hilang kapak. Lah manjadi jati dirinyo bahaso karakter urang minang biaso bamusyawarah dalam manata masyarakatnyo.

Ko bakato baiyo jalan ba molah, elok diambiak jo mufakaik buruak dibuang jo rundiangan. Luruahnyo makanan tiriak ko bana manahan bandiang bantuak di makan siku-siku, pamimpin indak bakato qadim rakyat pantang maangguak-angguak sabalun dikisai jo mufakaik. Nyampang kok salah kabijakan dilawan guru jo pituah disolang mamak jo nan bana baalih argumentasi. Sahinggo rajo adil rajo disambah rajo lalim rajo disanggah, baitu pula pikirnyo dari daulu sampai kini hinggo nanti barubah tido. Agaknyo ikolah hakikat demokrasi, urek tunggangnyo hak azazi pakaian urang minangkabau.

Sawah Rajo - Sumpur Kudus

Sawah Rajo - Sumpur Kudus

Manuruik ukua jo jangko sapanjang alua jo patuik mamasokan caro badesa nan bak mamakai baju sampik sutan, senjang lahia sumbang dibatin. Bak alang-alang lamah bingkai dihalau angin jo limbubu maliuak manapi turun haram ka naiak tagak tali. Itulah nasib minangkabau salamo dibawah rezim orde baru, hidup tanpa gairah mati kreatifitas & hilang dinamika bagi bangsa. Sistem badesa jo ba lurah hanyo cocok di alam otokrasi jo bantuak corak feodal. Disinan rakyat badarai hambo sahayo indak berhak basuaro. Tahunyo kanai parentah taat jo patuah tak manjawab, nrimo titah atasan mambantah kanai kualat maangguak gadang manfaat. Marangkak manyambah-nyambah marungkuak mancium tangan, bia salah kalau pamimpin tabu manyapo jo mambandiang konon pulo ka mangaritik, di Minangkabau …. “no way”.

Sistem badesa sasuai jo caro di militer nan absolut. Parentahnyo batanggo turun sahutan bajanjang naiak. Hirarki bantuak piramid bulek suaro nan dipucuak. Dari panglima turun ka kodam, dari kodam taruih resimen, dari resimen ka bataliyonka kompi tibo paleton hinggo ka regu nan dibawah. Jawabnyo saroman samo …. “siap dilaksanakan”. Indak ado istilah “tunggu” indak ado kamus mangaceh kunun pulo tagak mambantah. Iyo lasuah caro serdadu, tapi rakyat bukan prajurit antah kok dalam zaman parang. Nah sasudah nagari lah barubah dari Orba ka Reformasi, kini babantuk otonomi sairiang babaliak ka nagari. Mako timbualah tanyo baru….”what next?”….”baa lai sasudah itu?”….”kama awak lai?”

Biaso di dalam adat, kok tanyo tantu iyo bajawab kok gayuang bakandak sambuik. Tapi nan ka manjadi sauik saponyo jawab indak cukuik sapatah. Bajalan indak salangkah sampai sapancuang alun mamutuih. Mari kito sigo dari pangka, disisiak lalu ka ujuangnyo hinggo mausai sapalapah. Jan sampai sorong lumpatan takacak lalu tahampehkan serak baserai pacahannyo.

Nyampang kok itu nan tarjadi basuo bak pantun urang.

Tambirah tumbuah di tabek, pinang sinawa rancak ranun Dek salah managuak ubek, aie panawa jadi racun.

Angku, mamak , bundo sarato adi dunsanak nan kami muliakan, marilah kito danga MP3 Babaliak Ka Nagari dari angku Yus Dt Prapatiah, semoga bermanfaat, amin ya Rabbal alamin.

Yus Dt Prapatiah – Babaliak Ba Nagari

Yus Dt Prapatiah - Babaliak Ba Nagari
Yus Dt Prapatiah – Babaliak Ba Nagari

Yus Dt Prapatiah – Babaliak Ba Nagari 1    (27,7 MB)  

Yus Dt Prapatiah – Babaliak Ba Nagari 2   (27,9 MB)

Yus Dt Prapatiah – Babaliak Ba Nagari 3   (22,2 MB)

Yus Dt Prapatiah – Babaliak Ba Nagari 4    (17,1 MB)

wasalam

Kisah Mak Adang oleh Angku Yus Dt Prapatiah – free download


Assalamualaikum wr wb

Angku, mamak, bundo sarato adi dunsanak kasadonyo,

Dibulan suci Ramadhan 1432 H nan ko kami lewakan mp3 dari angku Yus Dt Prapatiah satantang kisah hiduik seorang parewa nan banamo Hasan Tabuah atau mak Adang. Semoga apo nan bisa kito dangakan dari curai paparan kisah mak Adang ko bisa diambiak pangajaran bagi kito basamo. Pabilo ado dari ka bakeh angku, mamak, bundo sarato adi dunsansak nan ingin mambarikan donasi, kami persilahkan lansuang menghubungi angku Yus Dt Prapatiah asa kanagarian Sungai Batang salingka danau Maninjau pimpinan Balerong Group Jakarta dengan kontak person 0815 971 9761.

Mungkin itu sajo dari kami, Semoga bermanfaat, amin ya Rabbal alamin. salam dari ranah minang, tanah pusako bundo kanduang.

wasalam

Padang, 17 Ramadhan 1432 H

*************

Tiok malam manjalang lalok sadang anok urang kuliliang, mak Adang maranuang surang. Adang manangih syahdu  syahdan, lah basah talang ulunyo mangana doso salamo ko. Makin acok mandanga kaji ceramah buya di musajik, tambah kucuik tali jantuangnyo mangana-ngana hiduik ka mati di akhiraik baa lah bisuak. Di etong indak tae tong, dibilang lah banyak amek, doso lah banyak tapabuek, tak mungkin barampun lai. Manuruik surang guru-guru, bia sagadang bijo bayam dapek ganjaran pambalasan, urang manuntuik pambayaran. Bisuak hari di Padang Mahsyar tampek naraco jo timbangan lah nyato barek ka kida. Manampuah titi jambatan sarambuik dibalah tujuah, tampan badambun ka narako, nauzubillah masya Allah…

Kini mambayang tampak jaleh tumpukan doso salamoko. Bara gadang durhako anak, mandeh kanduang maragang nyawo, anak di lapiak judi juo. Nampak-nampak di ruang mato rando di gadih ta aniayo ulah kaji gasiang tangkurak. PRRI dibantai APRI, informasi dari mak Adang. Pangulu, imam jo katik dileceh dicumeehkan, pareman patah-patah kanai kakinyo di terminal. Hangok pak mandua nan malayang kanai gayuang siuntuang sudah. Itu baru hubungan, kaitan jo manusia. Dikana pulo doso ka Tuhan, sumbayang indak barasiah, puaso sakali haram. Hampok pamenan tiok hari, tuak ka gantinyo kopi, zina nan indak bapimatang…sambuah.

Talampau banyak kalau dibilang sutan, panuah halaman kalkultator, error computer dibueknyo Allah sajo nan katahu. Tapi… dek lai rajin batanyo, sungguah baraja dek manyimak awak dipangka dimusajik, lamo-lamo taubek hati, tabik samangek ba ibadah mulo maurai ciek-ciek. Dipalanca bacaan shalat, dihapa ayat surek amma sampai bisa mambaco Quran. Kok sumanjak mulai sumbayang nan pandai hanyo rukuak tagak, urang sujuik awak pun sujuik. Kini lah paham tahu bana langkok jo dzikir doa-doa nan sunat sarato wajib. Konon kaji nan batarimo, sabanyak-banyak doso sagadang-gadang maksiat, kok lai tobat nasuha Allah mamaaf maampuni pupuah barasiah indak basiso. Iko nan alah baamalkan, yaitu mangaku raso basalah bajanji indak ka maulang, mambanci apo nan dilarang. Itulah tobat nasuha bukannyo tobat samba lado.

Makin dikali makin dalam tambah dikanang tambah nyato, bodohnyo badan salamo ko. Walau awak babuek jahek urang balaku baiak juo muko kama la ka disuruakan…. Baa ka indak? Partamo Syahrial manyalamaikan, hangok diujuang-ujuang badia awak buronan maso itu. Kaduo Katik Sampono, kok indak jaso baliau mungkin kajadi sarok balai, tampan ka mati tingga di kota gadang nan ko. Kaduonyo urang sakampuang nan salabuah satapian dunsanak caro banagari. Dek raso baradaik balimbago basuku bapuak-puak, gadang tolong bantuan adaik anak rang ranah Lubuak Aluang manyambuik dagang dari Medan. Raso ukhuwah islamiah jamaah musajik manyantuni ikhlas indak ingin harok baleh… masya Allah… masya Allah…

“Alangkah hinonyo diri nan ko ya Tuhan…”

“Urang sakampuang sanagari, urang  saadaik salimbago”

“Urang  saiman saagamo itu nan ambo zalimi salamo ko”

“Kini di saat awak tak badayo”

“Bukanlah sumpah batarimo bukan pulo dandam kasumat”

“Malah dibantu disantuni buruak ditimpo jo nan baiak tubo dibaleh aia susu”

Maafkan ambo… maafkan…”


Yus Dt Prapatiah – Kisah Mak Adang 1
 – 28,3 MB durasi 30 :12 menit 

Yus Dt Prapatiah – Kisah Mak Adang 2 – 27,7 MB durasi 29 :38 menit

Yus Dt Prapatiah – Kisah Mak Adang 3 – 27,9 MB durasi 29 :50 menit

Yus Dt Prapatiah – Kisah Mak Adang 4 – 27,9 MB durasi 29 :49 menit