Yus Dt Prapatiah – Babaliak Ba Nagari (free download)

Assalamualaikum wr wb

Manolah angku, mamak, bundo jo adi dunsanak sapalanta PAM nan kami muliakan,

Bismillahirrohmanirrohim,

Ibaraik kapa tangah lauik nan dihayak dek galombang gilo dihampeh-hampeh badai. Pidoman kalam bakuliliang, aie ganang diburitan, karang mahadang suo kida tampan ka karam hanyo lai. Disalo pakiak pasisianyo, tadanga sorak dianjuangan manyuruah babaliak pulang puta haluan ka pangkalan. Juru mudi manyintak lahia, bakayuah baganjua suruik manuju taluak palabuahan, tampek asa mulai batulak.  Itulah misa jo umpamo sutan, Minangkabau sangkek ba desa dibawah rezim orde baru, sampai manggaga reformasi. Sialah urang ka manyangko, awak nan sadang tagak tali bak kabau mahampang jalan. Tibo garak angin bakisa nan kodoh bapidah tangan, lalu kalua undang-undang banomor 22 tahun 1999, iyolah sorak otonomi. Siriah babaliak ka gagangnyo, pinang pun suruik ka tampuaknyo lah pulang mamak nan hilang. Salamaik jalan bapak kades, salamaik datang inyiak wali, kito babaliak ka nagari. Jaza kumul wal khairat, tarimo kasih baucapkan.

Lintau

Nak siang tarang bak hari mak asah tarang bak bulan sinan ka saiah ka maknanyo.  Molah … suruik disilau maso nan talapeh pambandiang zaman nan katibo. Usah basuo kecek pantun apolah bunyi pantunnyo,

Kapak siragai panutuahnyo,  ijuak tajalin jadi atok Galak badarai daulunyo, isuak manjadi buah ratok.

Mari kito baco kisah lamo simak di sutan elok-elok,

Kok masak satangkai tolong tuai masak sarumpun makan sabik Boneh naiakan ka rangkiang, hampo tinggakan dibalerong salah dek kami nan batanam.

Kok tibo tanyo jo siasek satantang babaliak kanagari kamano kito salamo ko? Jawabnyo indaklah lain, ulah dek saik penguasa urang bakasiah dicarainyo, nagari disiliah desa-desa, Minangkabau mati marano. Adopun nagari di Minangkabau bak ikan di dalam aie sutan. Hilang tuahnyo tabek gadang salamo puyu nan baranang inyo biaso dalam lunau. Sistem badesa jo balurah mungkin cocok untuak rang lain, tapi bukan untuak rang minang.  Survey mambuktikan, 20 tahun maso mancubo Sumatera Barat mamakai desa, nyatolah dalia sakahnyo gadang rugi dari labo dapek panjaik hilang kapak. Lah manjadi jati dirinyo bahaso karakter urang minang biaso bamusyawarah dalam manata masyarakatnyo.

Ko bakato baiyo jalan ba molah, elok diambiak jo mufakaik buruak dibuang jo rundiangan. Luruahnyo makanan tiriak ko bana manahan bandiang bantuak di makan siku-siku, pamimpin indak bakato qadim rakyat pantang maangguak-angguak sabalun dikisai jo mufakaik. Nyampang kok salah kabijakan dilawan guru jo pituah disolang mamak jo nan bana baalih argumentasi. Sahinggo rajo adil rajo disambah rajo lalim rajo disanggah, baitu pula pikirnyo dari daulu sampai kini hinggo nanti barubah tido. Agaknyo ikolah hakikat demokrasi, urek tunggangnyo hak azazi pakaian urang minangkabau.

Sawah Rajo - Sumpur Kudus

Manuruik ukua jo jangko sapanjang alua jo patuik mamasokan caro badesa nan bak mamakai baju sampik sutan, senjang lahia sumbang dibatin. Bak alang-alang lamah bingkai dihalau angin jo limbubu maliuak manapi turun haram ka naiak tagak tali. Itulah nasib minangkabau salamo dibawah rezim orde baru, hidup tanpa gairah mati kreatifitas & hilang dinamika bagi bangsa. Sistem badesa jo ba lurah hanyo cocok di alam otokrasi jo bantuak corak feodal. Disinan rakyat badarai hambo sahayo indak berhak basuaro. Tahunyo kanai parentah taat jo patuah tak manjawab, nrimo titah atasan mambantah kanai kualat maangguak gadang manfaat. Marangkak manyambah-nyambah marungkuak mancium tangan, bia salah kalau pamimpin tabu manyapo jo mambandiang konon pulo ka mangaritik, di Minangkabau …. “no way”.

Sistem badesa sasuai jo caro di militer nan absolut. Parentahnyo batanggo turun sahutan bajanjang naiak. Hirarki bantuak piramid bulek suaro nan dipucuak. Dari panglima turun ka kodam, dari kodam taruih resimen, dari resimen ka bataliyonka kompi tibo paleton hinggo ka regu nan dibawah. Jawabnyo saroman samo …. “siap dilaksanakan”. Indak ado istilah “tunggu” indak ado kamus mangaceh kunun pulo tagak mambantah. Iyo lasuah caro serdadu, tapi rakyat bukan prajurit antah kok dalam zaman parang. Nah sasudah nagari lah barubah dari Orba ka Reformasi, kini babantuk otonomi sairiang babaliak ka nagari. Mako timbualah tanyo baru….”what next?”….”baa lai sasudah itu?”….”kama awak lai?”

Biaso di dalam adat, kok tanyo tantu iyo bajawab kok gayuang bakandak sambuik. Tapi nan ka manjadi sauik saponyo jawab indak cukuik sapatah. Bajalan indak salangkah sampai sapancuang alun mamutuih. Mari kito sigo dari pangka, disisiak lalu ka ujuangnyo hinggo mausai sapalapah. Jan sampai sorong lumpatan takacak lalu tahampehkan serak baserai pacahannyo.

Nyampang kok itu nan tarjadi basuo bak pantun urang.

Tambirah tumbuah di tabek, pinang sinawa rancak ranun Dek salah managuak ubek, aie panawa jadi racun.

Angku, mamak , bundo sarato adi dunsanak nan kami muliakan, marilah kito danga MP3 Babaliak Ka Nagari dari angku Yus Dt Prapatiah, semoga bermanfaat, amin ya Rabbal alamin.

Yus Dt Prapatiah – Babaliak Ba Nagari

Yus Dt Prapatiah – Babaliak Ba Nagari

Yus Dt Prapatiah – Babaliak Ba Nagari 1    (27,7 MB)  

Yus Dt Prapatiah – Babaliak Ba Nagari 2   (27,9 MB)

Yus Dt Prapatiah – Babaliak Ba Nagari 3   (22,2 MB)

Yus Dt Prapatiah – Babaliak Ba Nagari 4    (17,1 MB)

wasalam