Arsip Blog

Yus Dt Prapatiah – Pitaruah Ayah Untuak Calon Pangulu


Assalamulaikum wr wb

Bismillahirrohmanirrohim.

Manolah  nak kanduang ayah, ka mari-mari anak duduak duduak ado rundingan ka disabuik. Ayah ingin bamuko-muko basurah batutua panjang bakato ba mungkin-mungkin. Nak lapeh sasak didado nak lansai utang ka bayia, jannyo takalang-kalang juo ibaraik duri dalam kuku bak tulang karongkongan kini malah ayah lafazkan. Waang kan alah tau juo nak, dalia nan sakah kaadaan satantang badan diri ayah. Umua samakin laruik juo bak hari bajawek sanjo. Lah sirah cayo muntari manunggu luluih ka tabanam. Tubuah lah puak kudaraik habih darah dingin bathinlah kandua paratian lah lamo puda. Sagalo pasak lah habih ranggang, satiok kabek lah habih lungga, serak baserai jo bagian itu nan lazim pado alam.

from www.kiwidandd.multiply.com

Pangulu

Apo nan lazim pado alam, daulu inyo tiado kudian barunyo ado akhianyo lanyap tak basiso. Jikok diliek pado nan lahia nak, dipandang-pandang dalam camin umua ayah indak ka lamo. Antah beko antah barisuak  ajadulah datang manjapuik nan punyo tibo mamanggia. Dari tanah suruik ka tanah pulang ka asa mulo jadi dunia balipek hanyo lai. Dek sabab karano itu nak, mananti ajal balun sampai tarago nyawo dalam tubuah salagi hangok turun naiak, nak ayah sudahkan karangko cinto nan lansai bangkalai kasiah, sayang nan tibo digunjainyo sinan salasai palangkahan. Oh nak kanduang sibiran tulang ubek jariah palarai damam si dingin tampa di kapalo, buah hati limpo bakuruang gantuangan ayah jo bundo. Anak mudo salempang dunie sumarak kaum Caniago pamenan suku rang Sikumbang bungo ka kambang di nagari. Dangalah melah elok-elok nak, simakkan bana nyato-nyato, mak jaleh makna paham nak sahiah sasaran kato. Piliahi sado nan taserak kampuangkan kok inyo taganang, ambiak nan boneh ka tinaman nan hampo bialah hanyuik.

Penghulu by Eddy S - West Sumatra - A Journey to Paradise_files

*******

Adi dunsanak sakampuang saranah minang dimano sajo barado, barikuik kami lewakan Pitaruah Ayah Untuak Calon Pangulu dari angku Yus Dt Prapatiah pimpinan Balerong Group Jakarta, semoga ado manfaat nan bisa kito ambiak untuak mambangun nagari asa kito masing-masing. Pabilo dari dunsanak ado nan bakalapangan, donasi bisa dilakukan lansuang mahubungi angku Yus Dt Prapatiah rang nagari Sungai Batang salingka danau Maninjau pado nomor 0815 971 9761. Demikian sajo nan bisa kami sampaikan, kok ado nan takurang, salah jo jangga itu datangnyo dari kami sabab nan bana hanyo datang dari Allah azza wajalla.

wasalam

Armen Zulkarnain
Padang

Pituah Ayah Untuak Calon Pangulu – Yus Dt Prapatiah

Pituah Ayah Untuak Calon Pangulu - Yus Dt Prapatiah

Pituah Ayah Untuak Calon Pangulu - Yus Dt Prapatiah

Yus Dt Prapatiah – Babaliak Ba Nagari (free download)


Assalamualaikum wr wb

Manolah angku, mamak, bundo jo adi dunsanak sapalanta PAM nan kami muliakan,

Bismillahirrohmanirrohim,

Ibaraik kapa tangah lauik nan dihayak dek galombang gilo dihampeh-hampeh badai. Pidoman kalam bakuliliang, aie ganang diburitan, karang mahadang suo kida tampan ka karam hanyo lai. Disalo pakiak pasisianyo, tadanga sorak dianjuangan manyuruah babaliak pulang puta haluan ka pangkalan. Juru mudi manyintak lahia, bakayuah baganjua suruik manuju taluak palabuahan, tampek asa mulai batulak.  Itulah misa jo umpamo sutan, Minangkabau sangkek ba desa dibawah rezim orde baru, sampai manggaga reformasi. Sialah urang ka manyangko, awak nan sadang tagak tali bak kabau mahampang jalan. Tibo garak angin bakisa nan kodoh bapidah tangan, lalu kalua undang-undang banomor 22 tahun 1999, iyolah sorak otonomi. Siriah babaliak ka gagangnyo, pinang pun suruik ka tampuaknyo lah pulang mamak nan hilang. Salamaik jalan bapak kades, salamaik datang inyiak wali, kito babaliak ka nagari. Jaza kumul wal khairat, tarimo kasih baucapkan.

Lintau

Lintau

Nak siang tarang bak hari mak asah tarang bak bulan sinan ka saiah ka maknanyo.  Molah … suruik disilau maso nan talapeh pambandiang zaman nan katibo. Usah basuo kecek pantun apolah bunyi pantunnyo,

Kapak siragai panutuahnyo,  ijuak tajalin jadi atok Galak badarai daulunyo, isuak manjadi buah ratok.

Mari kito baco kisah lamo simak di sutan elok-elok,

Kok masak satangkai tolong tuai masak sarumpun makan sabik Boneh naiakan ka rangkiang, hampo tinggakan dibalerong salah dek kami nan batanam.

Kok tibo tanyo jo siasek satantang babaliak kanagari kamano kito salamo ko? Jawabnyo indaklah lain, ulah dek saik penguasa urang bakasiah dicarainyo, nagari disiliah desa-desa, Minangkabau mati marano. Adopun nagari di Minangkabau bak ikan di dalam aie sutan. Hilang tuahnyo tabek gadang salamo puyu nan baranang inyo biaso dalam lunau. Sistem badesa jo balurah mungkin cocok untuak rang lain, tapi bukan untuak rang minang.  Survey mambuktikan, 20 tahun maso mancubo Sumatera Barat mamakai desa, nyatolah dalia sakahnyo gadang rugi dari labo dapek panjaik hilang kapak. Lah manjadi jati dirinyo bahaso karakter urang minang biaso bamusyawarah dalam manata masyarakatnyo.

Ko bakato baiyo jalan ba molah, elok diambiak jo mufakaik buruak dibuang jo rundiangan. Luruahnyo makanan tiriak ko bana manahan bandiang bantuak di makan siku-siku, pamimpin indak bakato qadim rakyat pantang maangguak-angguak sabalun dikisai jo mufakaik. Nyampang kok salah kabijakan dilawan guru jo pituah disolang mamak jo nan bana baalih argumentasi. Sahinggo rajo adil rajo disambah rajo lalim rajo disanggah, baitu pula pikirnyo dari daulu sampai kini hinggo nanti barubah tido. Agaknyo ikolah hakikat demokrasi, urek tunggangnyo hak azazi pakaian urang minangkabau.

Sawah Rajo - Sumpur Kudus

Sawah Rajo - Sumpur Kudus

Manuruik ukua jo jangko sapanjang alua jo patuik mamasokan caro badesa nan bak mamakai baju sampik sutan, senjang lahia sumbang dibatin. Bak alang-alang lamah bingkai dihalau angin jo limbubu maliuak manapi turun haram ka naiak tagak tali. Itulah nasib minangkabau salamo dibawah rezim orde baru, hidup tanpa gairah mati kreatifitas & hilang dinamika bagi bangsa. Sistem badesa jo ba lurah hanyo cocok di alam otokrasi jo bantuak corak feodal. Disinan rakyat badarai hambo sahayo indak berhak basuaro. Tahunyo kanai parentah taat jo patuah tak manjawab, nrimo titah atasan mambantah kanai kualat maangguak gadang manfaat. Marangkak manyambah-nyambah marungkuak mancium tangan, bia salah kalau pamimpin tabu manyapo jo mambandiang konon pulo ka mangaritik, di Minangkabau …. “no way”.

Sistem badesa sasuai jo caro di militer nan absolut. Parentahnyo batanggo turun sahutan bajanjang naiak. Hirarki bantuak piramid bulek suaro nan dipucuak. Dari panglima turun ka kodam, dari kodam taruih resimen, dari resimen ka bataliyonka kompi tibo paleton hinggo ka regu nan dibawah. Jawabnyo saroman samo …. “siap dilaksanakan”. Indak ado istilah “tunggu” indak ado kamus mangaceh kunun pulo tagak mambantah. Iyo lasuah caro serdadu, tapi rakyat bukan prajurit antah kok dalam zaman parang. Nah sasudah nagari lah barubah dari Orba ka Reformasi, kini babantuk otonomi sairiang babaliak ka nagari. Mako timbualah tanyo baru….”what next?”….”baa lai sasudah itu?”….”kama awak lai?”

Biaso di dalam adat, kok tanyo tantu iyo bajawab kok gayuang bakandak sambuik. Tapi nan ka manjadi sauik saponyo jawab indak cukuik sapatah. Bajalan indak salangkah sampai sapancuang alun mamutuih. Mari kito sigo dari pangka, disisiak lalu ka ujuangnyo hinggo mausai sapalapah. Jan sampai sorong lumpatan takacak lalu tahampehkan serak baserai pacahannyo.

Nyampang kok itu nan tarjadi basuo bak pantun urang.

Tambirah tumbuah di tabek, pinang sinawa rancak ranun Dek salah managuak ubek, aie panawa jadi racun.

Angku, mamak , bundo sarato adi dunsanak nan kami muliakan, marilah kito danga MP3 Babaliak Ka Nagari dari angku Yus Dt Prapatiah, semoga bermanfaat, amin ya Rabbal alamin.

Yus Dt Prapatiah – Babaliak Ba Nagari

Yus Dt Prapatiah - Babaliak Ba Nagari
Yus Dt Prapatiah – Babaliak Ba Nagari

Yus Dt Prapatiah – Babaliak Ba Nagari 1    (27,7 MB)  

Yus Dt Prapatiah – Babaliak Ba Nagari 2   (27,9 MB)

Yus Dt Prapatiah – Babaliak Ba Nagari 3   (22,2 MB)

Yus Dt Prapatiah – Babaliak Ba Nagari 4    (17,1 MB)

wasalam

Balerong Group – Narako Di Rumah Bako


Assalammuaalaikum wr wb

Dunsanak minang dimano sajo barado, tarutamo nan barado di rantau batuah jo nan di kampuang nan tacinto. Banyak terjadi kesalahpahaman memahami adat minang, walaupun ado alasan adat salingka nagari, balain nagari balain pulo adatnyo. Namun dunsanak, nan kami papakan iko adolah nan bakaitan jo pusako tinggi nan indak ado hubungan jo jo adat salingka nagari.

Kami persembahkan drama minang dari Balerong Group dengan judul Nagaro Di Rumah Bako, dengan harapan kito memahami apo nan sabananyo tujuan dari marantau, hubungan jo pusako tinggi & apo nan bisa dilakukan pabilo untuang indak dapek diraiah, nan malang indak dapek ditolak di rantau bantuah mantun.

Akhia kato, semoga bermanfaat, pabilo adi dunsanak bakalapangan kok ado nan ka didonasikan, bisa dunsanak hubungi lansuang Angku Yus Dt Prapatiah pimpinan Balerong Group Jakarta di nomor 0815 9719 761.

wasalam

Narako Di Rumah Bako

Balerong Group Jakarta – Narako Di Rumah Bako 1.mp3

Balerong Group Jakarta – Narako Di Rumah Bako 2.mp3

Balerong Group Jakarta – Narako Di Rumah Bako 3.mp3

Balerong Group Jakarta – Narako Di Rumah Bako 4.mp3

********

Syamsul : Ae rokok Angku?

Datuak Patiah : Eh kok rokok dari daun ka daunnyo koh. Kok indak daun anau jo daun nipah.

Syamsul : Kretek ko lai sasuai jo Angku ko ah?

Datuak Patiah : Sadang jo bendi lai sampai kunun jo oto sedan

Syamsul : Cubolah iko ciek angku hah.

Datuak Patiah : Ha iyolah… Karetek namonyo ko mah yo, cubolah agak sabatang.

Syamsul : Ha iko ko ah…iko ambo tinggakan untuak angku ko ah.

Datuak Patiah : Ee… batua sabanyak tu bana, bara bungkuih isinyo tuh?

Syamsul : Duo puluah bungkuih.

Datuak Patiah : Alhamdulillah… e lai salamaik di jalan?

Syamsul : Baraikaik doa, angku lai sihaik-sihaik se?

Datuak Patiah : Yo co ikolah sihaik rang gaek.

Syamsul : Nampak dek ambo, indak banyak bana perubahan Angku Datuak doh, basicogah juo saroman saisuaknyo.

Datuak Patiah : Cogah a juo lai ko, lah tambah ngunguak, kok bukik lah tinggi kok lurah lah dalam, raso tak lamo lai dunia dipakai.

Syamsul : Aa..mintuo kama angku?

Datuak Patiah : Pai manyilau cucu ka mudiak. Aa..takana diambo, anak-anak bih pulang?

Syamsul : Pulang sado alahnyo, pulang abih senyo angku.

Datuak Patiah : Bara urang paja-paja kini?

Syamsul : Batigo… badua laki-laki, surang padusi angku.

Datuak Patiah : Ah syukurlah, kama garan padusi?

Syamsul : Iyo urang sinan juo angku, kapak buruak tagadai maha.

Datuak Patiah : Oh, indak diagak-i baitu…urang awak urang lain samo sajo, nan pangka saiyo sakato. Kan lai saagamo?

Syamsul : Lai angku.

Datuak Patiah : Aa…rancak tuh, jan sarupo kajadian nan lah lapeh eh.

Syamsul : Baa kajadian nan lapeh Angku?

Datuak Patiah : Babini jo urang nan lain surau, bak ayam baranak itiak, nan sikua pai kalasuang, nan lain masuak ka lunau, di kandang baru basobok.

Syamsul : Aa, kalau minantu angku tu mudah-mudahan lai sasurau.

Datuak Patiah : Syukurlah.

Syamsul : Indak panuah ka ateh panuah ka bawah, ibadaik taik, sembahyang rajin.

Datuak Patiah : Alhamdulillah, syukurlah… iyo baitu. Anak-anak dididik jo ugamo, diaja mangaji, disuruah sikolah mak inyo jadi urang bisuak.

Syamsul : Lai Angku…. Mungkin kami kalamo di kampuang Angku.

Datuak Patiah : Rancak.

Syamsul : Nak mancubo pulo hiduik di kampuang.

Datuak Patiah : Bukan mancubonyo tu Syam…Tapi manikam jajak nan lamo.

Syamsul : Iyo Angku.

Datuak Patiah : Urang kampuang baliak ka kampuang, aratinyo sirih pulang ka gagang pinang pulang suruik tampuak. Iyo baitu nan katuju dek kami, jan tumpah ruah bana pai ka rantau. Tadorong sauak talampau rauik, sahinggo kampuang langang tapian, samak maratok, aruah urang daulu.

Syamsul : Iyo mukasuik kami marantau, nak mangulangi patanahan, sabab sawah jo ladang indak batukuak, anak buah bakambang juo, barabuik suok jo kamanakan Angku.

Datuak Patiah : Batua, tapi musti diingek Syam, rantau minang balain jo rantau cino. Dek kito ka rantau urang maamalkan pituah urang tuo, a pituahnyo?

Jarang-jarang  tugakan jaguang
Nak tampak puyuah balari
Adang-adang tinggakan kampuang
Tandonyo sayang jo nagari.

Datuak Patiah : Aa…maknanyo sakali-sakali maninggakan kampuang, indak bakalaran doh. Isuak kok nan dituga lah tumbuah nan dilambuak alah gadang, alun bana karimun rampak babuah labek ganjua lah langkah ka kampuang babaliak suruik ka nagari. Dibangun masyarakaiknyo, dipaliharo adaik jo limbago. Anak dipangku jo pancarian, kamanakan dibimbiang jo pusako, urang banyak dipatenggangkan. Itu baru manjadi minang sajatinyo. Ambo sokong niek si Syamsul nak manatap di kampuang, untuang-untuang manjadi contoh dek nan lain.

Syamsul : Bukan sakadar manyokong mah Angku, tapi mambantu.

Datuak Patiah : Insya Allah, insya Allah ambo bantu, tapi indak mambantu jo pitih ko hah.

Syamsul : Alah, pitih tu kan kamanantang habih tu nyo Angku. Nan ambo mintak jo Angku ko ah, bantuan jo caro, tolong jo aka dipitunjuak.

Datuak Patiah : Kok itu lai manaruah stek tu hah, nan pangka bakato baiyo bajalan ba molah, karajo basaro, itu nan paralu.

Syamsul : Iyo tarimo kasih Angku.

Pituah Adat Minangkabau MP3

Ikuti

Get every new post delivered to your Inbox.

Bergabunglah dengan 66 pengikut lainnya.